ضغط المجتمع علي المرأة بقلم/ وجدان أغا

اكيد كل بيت من بيوتنا المصرية سمعنا فيه جمل بتتقال للبنت زي :

 " البنت لازم تبقى مؤدبة وما تتكلمش كتير"، "البنت متضحكش بصوت عالي " ، " البنت متلعبش كورة زي الولاد " ، "حافظي على شكلك قدام الناس " ، " ما تهزيش رجلك وانتي قاعدة " وغيرهم كتيييير … 

وبمجرد ما البنت تكبر… الضغط بيتغير، مش بيقل : 

"مش هتشتغلي؟ طب مش تتجوزي الاول ؟ "

لو اتجوزت: "طب فين البيبي؟"

لو جابت البيبي : " طب يالا بقي هاتي التاني بقي عشان يسلوا بعض !! "

لو جابت اتنين: " مش كفاية كده ولا ناوية علي فريق كورة؟"

يعني مفيش راحة …

 الست دي لو فتحت الشباك هتلاقي المجتمع بيقولها : فيه حاجة لسة ما عملتيهاش … انتي متاخرة … ناقصك حاجات كتير … بردو لسة مقصرة … 

خلينا نتكلم بصراحة… كلنا اتحطينا في مقارنة في يوم من الأيام.

" بصي بنت خالتك خسّت ازاي وبقت قمر !! "

" صاحبتك شعرها بقى أطول وشكلها بقي احلي منك "  

" شوفي جارتكم شاطرة في المطبخ إزاي! " 

أيوة! … كأن الست مشروع لازم يبقي “perfect" طول الوقت ….

ولو قصرت في أي حاجة حتي لو بسيطة، يبقى خلاص: " دي ما بتهتمش بنفسها ومش شاطرة ومش عارفة تعمل حاجة ومقصرة !! " 

المجتمع بقي بيطلب من الست انها لازم تكون “superwoman” تهتم بنفسها وتروح الجيم … وتهتم ببيتها … وجوزها … وتكون أم مثالية… … وتطبخ… وتودي الولاد المدرسة … وتذاكرلهم … وتودي الدروس والتمارين …

وفي الآخر يجي جوزها يسألها:

" انتي ليه مرهقة كده؟ " بدل ما يساعدها ويخفف من عليها … 

بس بردو احنا كستات ما بنغلبش ومش بنيأس … 

 فيه قصص لستات كتير قرروا يكسروا ضغط المجتمع.…

زي مثلا اللي بدأت شغل بعد سن الأربعين، وكسرت فكرة " مين هيشغلني او هشتغل ايه في السن دا " .

وواحدة تانية قررت تعمل بزنس خاص بيها رغم إن كل الناس قالولها " مش هينجح" … بس كملت ونجحت .

وفيه كمان أمّهات بيحاولوا يوازنوا بين شغلهم وبيتهم وولادهم …

لانهم اكتشفوا إن مفيش حاجة اسمها “perfect mom”، فيه “mom بتحاول” …. وده إنجاز لوحده! 

إحنا مش جايين نقول إن الضغط دا غلط …

بس جايين نقول إن كل واحدة ليها حق تختار حياتها من غير ما تتحاسب عليها.…

ولو المجتمع مصمم يضغط… يبقى دورنا إننا نقلل الضغط عن نفسنا بنفسنا .

ندوّر على اللي بيسعدنا… ونفتكر دايمًا إن قيمتنا مش في "رأي الناس" … قيمتنا في الانجاز اللي هنعمله عشان يبسطنا ويفرحنا ويضيف لينا ولحياتنا… 

وفي الاخر … مش لازم نبقى perfect.… لكن لازم نحب نفسنا وحياتنا ونعمل اللي نقدر عليه وبس … 

وجدان اغا